Joh 17 | KMG | STEP | Jesu e dâŋ i mutararâ sambâŋko fime feha šiŋuc muhuc numuwec: “Mamac, dameŋ maickekac. Go Ŋokâgere huriri qâreŋ bâfuatec Ŋokâzi iŋuc jaha gore huriri qâreŋ bâfuazejec.

John 17

Mâmâzoc nunumu: 1. Jesu e jahacnere numuwec

1 Jesu e dâŋ i mutararâ sambâŋko fime feha šiŋuc muhuc numuwec: “Mamac, dameŋ maickekac. Go Ŋokâgere huriri qâreŋ bâfuatec Ŋokâzi iŋuc jaha gore huriri qâreŋ bâfuazejec. 2 Go e mâreŋ sâc ŋic jaŋere rusâko râemeŋ, ehuc ŋic erao ŋec-jopameŋ sâc jaŋe juju sanaŋ bâfua-jareocte mucnemeŋ. 3 Juju sanaŋte fuŋne ine šiŋuc fokac: Go Anutu fârine mocjaha â soremeŋ, Jesu Kristo hâcne, ŋic jaŋe iŋuc mana tarac-nâfopie juju sanaŋ fua-jareocmu. 4 Gie munaremeŋ i baku batarape mâreŋko huriri qâreŋge fuakac. 5 O Mamac, mâreŋ mi fuahame gohec sambâŋ tatamac-nanehec jupo, ijaha ši mocwâc bârisie-naretec rojuzepac.

2. Motec jaŋere numuwec

6 “Guru sâkoonec ŋic nore bâwosâec-jopameŋ jaŋe biŋedâŋge mujaŋgeŋke-jarepo. I gore biŋe juhapie nore qikiŋ-jopameŋ, eme jaŋe gore dâŋ ropie maŋjeŋic ewec. 7 Wiac fonarekac i goraonec sasawa, jaŋe i mana taraŋgopieŋ. 8 Go dâŋ naremeŋ i jarepe ro sakarec embiŋ. Ehuc goraonec wahapo i manapaŋkembiŋ, â go gahac gie munaremeŋ i mana šakiembiŋ.

9 “No jaŋere erâ numu-garekopac. Miti tâmiric jaŋere erâ mi numu-garekopac, naremeŋ jaŋere sawa erâ numu-garekopac, jaŋe gore biŋe hâcne. 10 Nore biŋezi gore biŋe â gore biŋezi nore biŋe. Eme maŋjeŋicko huriri qâreŋ-nane fuawec fokac. 11 No mâreŋko juju-nane tarakac, jaŋe ine mâreŋko šuhuckerâ juhapie no gorao fâzo ekopac. Tiri Mamac, biŋedâŋge naretec jazapo, eme go hemiriŋ-jopatec dâŋ irec maŋnao junšepieŋ. Eme nâhâc maŋ mocjaha juekoperec, iŋuc jaha jaŋe maŋ mocjaha junšepieŋ. 12 Jaŋehec jupo sâc biŋedâŋge naremeŋ izi hemiriŋ-jopape irec maŋnao jumbiŋ. Ehuc soŋaŋ-jopape moc mi sifuckembiŋ. Dâŋqâreŋ sanaŋkeocte hârâcte biŋe mocjahazi sipirickewec. 13 Ʒi gorao fâzo ehuc šira mâreŋko dâŋ iŋuc gazape nore bubiaŋzi jaŋerao fotâcnerâ ɋârâŋkeme bajunšepieŋ. 14 No dâŋge jarepe bajupie mâreŋte biŋe jaŋe qaisoc-jopaeŋgopieŋ. No nahac mâreŋte biŋe mi juekopac, iŋuc jaha jaŋe mâreŋte biŋe mi jueŋgopieŋte iŋuc hâcne ejareeŋgopieŋ. 15 Go mâreŋkonec rocjopacmurâ mâcne, sâqocnere ŋezic-jopacmurâ gazakopac. 16 No gâtâ-nane mâreŋko mi bawec, iŋuc jaha jaŋe gâtâ-jeŋic mâreŋko mi bawec. 17 Gore dâŋ fâri qizecnezi maŋjeŋic furu batec fozejec. Gore mitizi dâŋ fâri qizecne hâcne. 18 Goki no mâreŋko gie munaremeŋ, iŋuc jaha noni jaŋe mâreŋko gie mujarepo. 19 Jaŋe dâŋ fâri qizecnezi maŋjeŋic furu bame juniŋte no nahac wâc jaŋere erâ maŋsahac-nane bâtirirâ râekopac.

3. Miti mamana nâŋâcnere numuwec

20 “Erâ no jaŋere sawa mi numu-garekopac, miti jazapie manasiŋnuniŋmu jaŋere mâmâc numu-garekopac. 21 Jaŋe maŋwirec erâ juniŋte gazakopac. Mamac, go no maŋnuekic â noni go maŋguekopac, iŋuc jaha jaŋe nâhâc maŋnâfonšepieŋ. Iŋuc epie miti tâmiric jaŋe gahac sorecnutec wahapo i manapaŋkenšepieŋ. 22 Nâhâc maŋ mocjaha juekoperec, iŋuc jaha jaŋe maŋ mocjaha erâ junšepieŋ. Iŋuc juniŋte hâcne huriri qâreŋ naremeŋ ijaha jarepo. 23 No maŋjopahape go maŋnutec jaŋe maŋzi šâšâfic ehuc hâcbuc erâ junšepieŋ. Iŋuc jupie miti tâmiriczi goki sorecnutec wahapo i mana šakienšepieŋ, â no maŋzi šâficnuhuc jaŋe mâmâc šâfic-jopaekic, i wâc manapaŋkenšepieŋ. 24 Mamac, naremeŋ ŋic i jaŋe no jupemuoa juniŋte mukopac. Eme mâreŋ hobeteŋne mi fuahame maŋjauŋ enarehuc sambâŋ tatamac tahacnumeŋ, i hâcne nohec juhuc hone aŋac enšepieŋ. 25 Mamac, tiŋne rune, ŋic jaŋe mi mana taracgumbiŋ, noni ine mana taracguekopac, erâ kikefuŋfâc-nane jaŋe gahac sorecnutec wahapo i manapaŋkeeŋgopieŋ. 26 No biŋedâŋge mutaniŋke-jarepo erâ mutaniŋke-jarehuc jupemu. Eme maŋjauŋ no enaremeŋ ijaha jaŋerao fome maŋjopahuc jupemu.”